西九龍海濱長廊．偷影唔到一身蟻民

時間一轉就來到2015年尾聲，無錯丫慈母最近又癮起寫Blog，大家要準備好我連串的文字攻擊啦！
上星期日，戰隊相約到西九龍海濱長廊聚會；





西九海濱有咩好？
好在可以有單車租、有單車徑、有草地、有海景、可以放狗和放細路；


(photo by mag)

咁西九海濱有咩唔好？
車位少呀！到埗時見到呢條車龍令慈母相當火大！


最唔好還有嚴重缺乏可供遮蔭的大樹，呢日我們根本就是在沙灘搞派對，只是大家都wrong dressing而已；


仲有呀！慈母發現西九蟻患相當嚴重，當日我坐在車場旁的草地上擔當戰地記者，歷時還不夠10分鐘，突感手指疼痛，然後細看原來被antman襲擊，最後偷影唔到一身蟻，可憐的慈母．．．
唔知蔥頭有無比蟻咬呢？


呢日西九有一個名為『自由約』的活動，有音樂表演、攤位遊戲和小物販賣，五光十色的，然而當你被兩隻眼前只有單車的怪獸牽絆著，一切就只能走馬看花；


然後臨走前見呢個攤位人龍尚短，就推兩隻怪獸上前略玩，結果就做了兩隻『真竹』蜻蜓；


因為約會是即興的，大家都無為野餐準備，所以當我見到隔離墊的遊人又香檳又parma ham、又壽司又西瓜，我們墊子空蕩蕩的時候，隻眼瞬間冒火，羨慕入骨～
(突然我明白antman的由來了．．．)


不過，當太陽開始落山，長廊就回復清涼，戰士們由頭玩到尾，其實怕熱怕曬的只是我們班老弱大人吧？


後記（亦是本文重點）：
前兩日食戰母飯後坐火車回家時哲媽提起，當日anson和哲哲飆單車後一齊嘆汽水，哲哲弟底初一就望住阿哥的罐底望梅止渴，然後anson一個好兄弟上身跟哲哲說：『喂！你唔可以咁對個細佬架，對細佬好D，比D佢飲啦！！！』
慈母聽到後差點淚染東鐵，Aidan呀！！哥歌係打從心底錫你架…
小雨點點滴
＊anson知道哲哲出席好開心高呼：『好野！』


＊排排下停車場突然管理員叔叔開放另一邊爛地，所有車一湧而入，隔離車司機哥哥話可以大安旨意免費泊車，但慈母還是乖乖自首拎入閘紙；結果離開時無票者道大排長龍（！）好心有好報呀～～～
＊慈母捨命博躉一笑壯烈犧牲，有圖有真相呀我幾偉大！
(photo by 米爸)

＊三年了…躉睿仍然是維持『相愛很難』的關係，我和襯家99唯有繼續活在幻想裡～

＊我影得好少相，多得maggie ee全程戰地跟到足！