5日4夜首爾拋夫帶子頻撲玩雪之旅DAY2 - Figure Museum > Line Café > 牛湯鍋DINNER

離開公園又返回地鐵站，又靠99帶路搵路，然後見到個｢影相的階梯｣，又無咩人，我地又影大合照XDD。



呢個就是慈母因為投仔所嗜而舉手要求加入行程的FIGURE MUSEUM；



入場費不算價，人頭費幾十，慈母一大兩小埋單HKD179.02（費用資料來源：rice b family）


GROUND FLOOR是一個休憩小廳，售賣現成飲品和零食，即是所謂的CAFE，還滿以為有超人pancake呀...ironman湯麵... spiderman汽水嘆...

無野食唯有投入參觀，呢層有各式各樣的Gundam；

相機壞掉只有手機爛照...

呢層ANSON睇到唔願走，因為有各式跑車模型；

躉見到阿歌影相又爭住要影，仲要抱逐架影，影車又唔比影人，命都無...

再落就是shopping level；

話說anson看中了一套starwar攝錄直昇機，一看價錢9萬8WON，屈指心算哇！七百個大洋，慈母即時洒手；

然後anson就一副｢阿媽正一孤寒鬼｣的面口，我極力說服他考慮其他便宜一點的figure，不過阿哥向來睇中果樣就果樣，兩母子陷入薑持狀態；

不過慈母也不是省油的燈，旅行並不代表可以放肆購物，打完比家丁報告後再次重申拒絕的理由，之後可以做的就只有靠他自己消化，700元是一個8歲小朋友理應可能了解的銀碼。

躉就纏著要扭蛋蛋，不過蠟筆小生，聖鬥士都不是躉杯茶，慈母就遊說找火車蛋蛋仲好啦！躉一聽到火車就雙眼發光，開開心心同扭蛋機say goodbye！

最底下層就是一個遊樂區，阿躉又上身了XDD

大人可以坐下HEA下；

細路可以隨意在桌子的機關位找到不同小玩具鬥智一番；

有得打機就忘形的哥歌，心情轉眼好返啦！

逗留時間短而且走馬看花，如果有時間hea耐DD就好了；

之後肚仔響警號，去了一間細路見到開心到跳起的餐廳，食壽司！

平時香港食壽司都唔駛點睇價錢，所以anson未坐底就手起刀落，幸得米爸速速通水，anson手上的壽司索價七十（！）我即喝停anson，接下來要見餐牌行事；

可憐的anson被荒亂的阿媽整個嚇傻，米爸更急忙幫anson解圍；

經慈母精算後，避開不合理的項目，兩兄弟都各自食到最喜歡的三文魚、蟹籽、蝦和烏冬；

阿媽又不會肉赤荷包，皆大歡喜～

食飽飽繼續行程；

落地鐵，起程去Line Cafe；

喺月台都玩一餐既港童；

出地鐵，雨愈落愈大，原來呢間line cafe距離地鐵不算近，我們撐傘又顧著孩子的走難似的；

進入cafe關傘子又叫孩子咪亂跑相當狼狽，於是店裡的寧靜又被我們破壞掉；

anson和躉見門前隻巨人熊大好興奮丫！即時就飛撲過去～～～把正在排隊的韓國女孩嚇到花容失色；

真係失禮人，下次出遊前記得好好教育一下兩子的旅遊manner！

地庫鴨仔就無需排隊任拍；

今次大少看中的是一隻睡衣熊大；

慈母計算機又啟動，心想：成兩百蚊隻公仔，又唔益智又唔實用，好唔想比錢囉！

然而anson一副可憐狀，跟爸爸求情時還流眼淚，慈母不忍心骨肉分離（公仔和anson）就心軟了...

好啦！開開心心食完雪糕，慈母就慷慨解囊；

不過慈母還是有酌量解釋這公仔已經用盡了他整個trip的shopping quota，之後我話唔買唔可以買架啦~~~

躉就簡單好多，一出火車就投降XD；

最後人人都滿載而歸；

好啦終於完成今日的行程，怕蝕底的躉終於可以放心休息XDD；

由line cafe行返地鐵時滂沱大雨，狼狽走難模式又要啟動，好彩有各大power Rangers幫手抱躉又遞傘，anson又生性跟大隊行自己照顧自己，總算安全著陸。


可惜我們又誤點，又食唔到神母DINNER，於是去了文叔介紹在民宿附近的牛湯窩餐廳食dinner；



本人對牛筋和牛尾非常滿意!


三湯一煲加前菜小吃就放滿一桌；
總之有KIMCHI慈母就胃口大開～


我和99的飯腳又係潘生潘太XDDD
其他couples腳太~~~~~長坐不了和式餐桌~


所以我們四人就和細路佔據一整排桌；
呢晚食量是anson碗大半飯，躉半碗+一隻巨型餃子~


食飽飽鍾氏夫妻犧牲小我帶anson等大小孩先回民宿，我和99、power couples x2就去shopping。


躉爺終於有戰利品啦就係垃圾桶一個wakakakaka！
叫佢買隻恐龍都話唔要呀真係抵錫！

第二日完...
好累；

點與點之間都要三萬里長征，大人細路走難一樣，回到民宿幾近虛脫；

不過睇返相都係快樂回憶，同埋聽日一定會好天既！

💦小雨點點滴

❄️figure museum度我係用溫柔tone解釋，唉好怕呢Ｄ場面。。。
❄️間壽司真係好貴，一碟2件裝普通甜蝦壽司70蚊，鑲金嗎？
❄️同細路講買野真係一場角力，好累，累到完全無心情好好參觀line；
❄️唉...其實我係咪太執著同孤寒...
❄️呢隻躉喺人地餐廳360度迴轉式爬跑，搞到隔離台的韓國family又白眼我地，究竟邊個話佢可愛架？！吓？！

❄️買左個背囊比留港家丁做情人節禮物XD