四佬之二三事

聽說有幸擁有兩個小孩的家庭，大多數是一個好湊得像天掉下來的禮物，湊養工夫就只比養隻小狗多一點；然而另一隻，就會是頭魔鬼怪嬰，令父母企又不是坐又不是，吃又不能喝又不可，抱著哭不抱直頭被虐待般大叫....

Anson絕對是天掉下來的禮物，一天睡廿三小時，剩下的一小時包辦8餐奶8次片洗白白等所有工夫。
Aidan呢？雖未入魔鬼之列，但他絕對有當小魔怪的潛質...嗚...（但當然慈母兩個都愛，兩個都是冧巴溫啦！） 

我想說的是，Aidan有「堅決拒絕質奶暴龍症」；

Aidan不算過分嘆奶，以現在能吃四到五安的份量來說，二少可在十分鐘內先完成三安，不過尾數就需要一些時間，又呃又氹才勉強埋單；剛剛回家未摸熟二少脾性的日子，慈母好天真好傻地以為像當年應付阿gor一樣硬塞就得，結果每次都搞到「暴奶成（哀）哉」，床褥梳化無一幸免，每次看著小暴龍把辛辛苦苦啜下的統統從口鼻噴出，小眼睛裝滿淚水，滿面通紅，邊噴邊緊捉我的姆指，個樣仲慘過唐唐選不到凸手時...慈母個心就實哂...

以為是奶咀問題？換過三個牌子亦幫助不大，對於未曾經歷過湊仔災難的我和家丁來說，餵奶變成了奪命習作。老實說，要不是那都是滴滴皆辛苦的話我絕對不想用迫（！）不過，今次哀家確實要認輸了~  

後來經過數星期互相了解後，我們漸漸學會從Aidan肢體語言知道二少想點，譬如「頂住唔該掃風」會罷飲吐出奶咀、「未eur哂唔該掃多陣」會腳撐撐示意、「唔好再迫我唔係就嘔」就嚴重皺眉加鎖鍊式封咀等；另外，找尾數時Aidan通常會表現得欲拒還迎，此時我就要用無限耐性以奶咀輕敲他小咀，直至他肯再打開咀巴做生意後才餵入。終於最近漸見起色，母子的眉頭不用再深鎖了。 

Aidan另有皮膚問題．

醫生雖未下定此為濕疹，但已夠我們心煩。粒粒集中於面上，狀似酒米仔，咀邊和下顎位置更嚴重....簡直是沙紙一樣(◞‸◟)，而身體則（touchwood）沒見異樣；吃人奶時皮膚質素會比較好，前兩日慈母停餵一日就即時無情講-紅返哂！最近正在試用恩契媽介紹的cream，但願粒粒只是胎毒未散吧！ 

睡覺呢？

下午時間極度黏人兼零安全感，非要抱睡不可，不過到了黃昏又回復正常，晚上可熟睡長達六小時。這跟四佬的胎動情況很相似，日光日白就乾衣機，晚上慈母上床躺下，四佬就變回分體式冷氣。
復工以後的日子，就辛苦車厘子姐姐了。