走失驚魂..........貳

最近因為公司和人生都開展左個新PROJECT而忙爆左...但有件事不得不記下來...


話說之前某星期六早上，慈母興之所至帶阿仔到新城市廣場嘆早餐去公園，吃飽飽又到遊樂場出身汗再去圖書館和藝術館過冷河，過了一個十分母慈子孝的早上。

將近lunch time，母子倆便先到一田foodcourt食lunch然後再會合家丁返anson學校見老師；
到達foodcourt，慈母帶阿仔買了兩樽巨型鮮果汁後找好座位，然後問阿仔：「mama去買野食，你飲住果汁等mama返黎O唔OK？」，阿仔信心十足答：「OK！」，於是慈母便頭也不回地投進食物攤位付款的人龍裡。
約5分鐘後，慈母拿著單據走回桌椅位置打算跟阿仔齊齊嘆住果汁等吃，誰知遠遠看到座上竟空空如也（！），只剩anson的叮噹娃娃孤單地抱著兩枝巨型果汁；我連忙跑上前問本來坐在anson對面的女學生：「頭先個小朋友呢？」，女學生輕描淡寫道：「佢話佢去搵媽媽喎！」
我急忙轉身返回食物攤位，在人龍間穿插，又跑回剛才買果汁的地方，我重覆著上次的動作 - 來回回來來回食物攤位和果汁檔之間，從暗喊：「anson！」到放聲大叫都聽不到任何回應，今次比上次更大鑊的是，foodcourt是個完全open的地方，沒門沒牆，即是說anson隨時有可能跑到更遠的商場去。。。
人開始著急到窒息，但我已不知該往那一個方向跑，於是盤算要到客戶服務部搵人叫咪搵仔；
突然聽到廣播：「傻瓜詠家長，傻瓜詠家長，請到二樓客戶服務處。傻瓜詠家長，傻瓜詠家長，請到二樓客戶服務處。」

此時心情有點定下來，走到客服處counter，見到一個三歲大半的男孩坐在轉轉椅上的背影，聽到他談笑自若地跟姐姐們吹水的聲音，我哭笑不得：「譚亦朗！！！」
anson轉過來對著我笑，還向姐姐介紹：「呢個就係我個傻瓜詠媽媽。。。」
客服姐姐笑說：「哦～～你就係傻瓜詠家長，你個仔唔見左你都無喊呀～仲係咁話你叫傻瓜詠～電話9777XXXX」
我苦笑回應，道謝後便拉兒子離開。

走回foodcourt的樓層，anson ba也剛好到達，我趕急在anson做初一前先做十五企圖掩飾罪行，但似乎這只是我個人的妙想天開。。。

家丁：「做咩mama叫你坐定定等你會走開左架？」
阿仔：「我想去搵mama丫！」
家丁：「跟住呢？」

阿仔：「跟住唔見左mama，跟住我就去左搵保安叔叔，跟住保安叔叔帶我去搵姐姐」
家丁：「咁你同姐姐講咩呀？」
阿仔：「我講mama個名同埋9777XXXX，我好叻呀！無喊！」
家丁：「下次mama叫你自己坐喺度等佢你就要乖乖坐喺度等丫～～如果唔係一行開mama就搵唔到你，同埋如果你唔想一個人就同mama講唔！O！K！知道未？」
阿仔：「知道。」

一個星期後的某個晚上，我才突然想到anson走失如被拐，之後被人敲斷手腳行乞的畫面，頓時膽顫心寒，要緊抱身旁熟睡中的小人定驚。

我再一次問自己：點可能犯同一個錯誤兩次？！
感恩anson受教，有緊記我們教過走失要找保安叔叔，還有我的名字和電話號碼；
感恩那位保安叔叔是位真正的保安叔叔，而不是拐子佬；
我承認。。。某程度上我過於高估anson的耐性和能力；

我也承認。。。某程度上我過於掉以輕心、大安旨意；

天呀！！我點先可以唔再重覆犯錯？