number 1 的故事

剛剛收到陳主任電話，劈頭第一句就是問慈母：「你呢個假期究竟同anson做過D乜黎？！」

話說上月聖誕元旦假後，anson上學就出現好大問題，先是早上嚴重賴床，繼而是發爛不肯刷牙換衫，至順利出門口交人給嫲嫲後，隨即又會收到小人致電哭哭啼啼吶喊扮病，他的目的，好明顯就是「唔想返學」．

起初我和家丁亦大安旨意，直覺認為只是小事一樁，應該是長假期後遺症之類吧？anson一向不難纏且無心肝，多返兩日學就會無事了．直至學校主任、中英文班主住輪流主動致電，從她們口中所形容的anson就像中了魔降一樣，失常尖叫、失控lur地、專門唱反調、完全不肯入課室、討厭老師和同學...我忍淚自問：係咪認錯人咋？呢個係我anson boy嗎？
Anson自細最無需要兩老擔心的，就是上學；記得當初幼兒班開學也只是早上返學時洒兩滴眼淚而已，因此老師當年的評語令我們一直引以為傲．但今次...我們完全束手無策...

由元旦開學到新年假開始前的三星期，我們譚家就如遭逢十級大災難一樣，每朝角力、每晚開解、重覆解釋責任道理，言談之間要避重就輕之餘還希望chok得點點蛛絲馬跡，解開anson突然360度轉變的原因．除了在校，呢段期間anson亦把慈母由二奶提升至磅首位置，無事mami~有事也mami~　起初以為是我努力的成果，卻發現這其實是惡夢之開始...

密集式的家校溝通後，我們曾經鎖定幾個疑點，包括「要好同學仔退學？」「返全日班反彈的反應」「老師問題？」，而唯一一個被我和家丁即時否定的原因是「同bear bear有關」．因為我們早有為anson提供一等一的心理輔導，自問大事細節也有安排周到，加上呢個第二胎我們的確很hea，除基本每月檢查外實際上是零動工，而且anson從內到外都對bear bear表現得極度期待，所以我們自信地把這個原因 - 排除！另外為免節外生枝，我們亦索性對此絕口不提．

後來聽過網友意見，加上契媽與anson的一次盡數心中情後，我們開始動搖，或者當中有些無形感受，一直存於anson的潛意識中，即是說可能連anson自己也不知道，何況要說出來？既然遍尋「病因」不果，跟陳主任溝通後，她建議不妨直接問anson一次：「你係咪驚mama生左弟弟之後會唔愛你？」於是weekend親子浴時anson就此提問暗然點頭...更說是XXX同學仔（他的best friend）跟他說的...
我不是說笑，我真係好想搵日放學的呢條細路入後巷毒打！！ 

第二朝我急不及待向陳主任報告，學校方面即時作出恰當的「處理」，到了農曆長假期開始前的兩個上學天，anson的上學情緒有明顯的好轉．假期裡，我和家丁亦對anson落重藥，內裡成份不外乎是愛、愛、愛和愛...還有，為anson添了一個別名 - number 1（永遠都是babamama心目中的number 1的意思）

陳主任今早的電話，說anson已經完完全全回復正常，跑入學校第一時間跑到陳主任面前笑說：「我返左黎啦！！」陳主任本來預備好一籮肺腑之言打算要應付anson，聽到呢句，我又忍唔住開水喉了～～～

實在很感激學校，天下太平時，我以為呢種貴價學校只在乎學費收入，但原來當發生大災難時，她們不但不會置家長於不顧，還會出心出力伸出救援之手的．
最後，希望出文之後千祈唔好反彈丫！！唔該！！！